معقولة الحب يغير ف الإنسان...؟
إزاي..؟ وبأي أمارة..؟ وليه..؟
إزاي لو حد غشيم وقليل الذوق يصبح فنان..؟؟
إزاي الضِلِم القِتِم الخمة بيبقى نبيه..؟
إزاي لو حد بخيل...
يتحول فجأة نبيل..؟
إزاي ممكن يصرف آخر قرش معاه...
...ف مكالمة تليفون يطَّمِن بيها عليه...؟
إزاي..؟ وبأي أمارة..؟ وليه..؟
الحب من الإنسان...
فازاي ممكن إنه يغير ف الإنسان..؟
لكن دي حقيقة...
مش راح تتأكد منها الا ان جربت بنفسك...
...أنا ما أظنش
إن الحب ده ممكن إنه يغير ف الإنسان...
بس الحب بيقدر إنه يطلع أحلى ما ف الإنسان....
جايز جداً -وأكيد- إنه نبيه..
وما كانش ملاحظ...
جايز إنه يكون فنان إنما مش واخد باله...
جايز جداً إنه كريم إنما ماعرِفْش....
أنا رأيي إن دي قاعدة تشمل كل بني الإنسان..
وان كنت ف دول..
وان كانت أحلى صفاتك ما بتظهرش عليك...
جرب مرَّة وحب..
لو حتى ما كنتش فيهم برضك حب..
فالقاعدة الثابتة جايز برضك تتغير...
والحب يغير فيك...!
السبت مايو 05, 2007 1:26 am
