الرئيسيةس .و .جبحـثالتسجيلالأعضاءالمجموعاتدخول

شاطر | 
 

 مغامرات مواسرجي-في ماكدونالدز -الجزء التالت

اذهب الى الأسفل 
كاتب الموضوعرسالة
meko_86
مشرف قسم
مشرف قسم
avatar

عدد الرسائل : 178
العمر : 32
تاريخ التسجيل : 25/11/2006

مُساهمةموضوع: مغامرات مواسرجي-في ماكدونالدز -الجزء التالت   الأربعاء أبريل 18, 2007 11:06 pm

نزولا عند رغبة الجماهير هي الحلقة التانية من مواسرجي مع بنت الوزير

هالمرة في ماكدونالدز




طبعا انا لما شفت البنت هاجمه علي وبدها تعبطني والمحل كله مشرتحين انا قلت هاي نشاله

او اشي فرحت دفشتها لورا وكنت بدي اكبسها بكس على نص عينها لولا اني عرفت انها بنت الوزير

فقلت بلاش اتورط وانضرب كمان مره خليني ساكت احسن المهم البنت بتقوللي مالك توتي انت

ما عرفتني ؟؟ قلتلها انتي.................؟؟؟؟ ردت بسرعه ايوه انا سوسو ....سوسو اللي صارلها

شهرين بتحكي معك معئول ما عرفتني يا دكتور توتي؟؟ قلت بعقلي انا توتي ....وهي سوسو

من وين اجاني هالاسم؟ والله لو امي تعرف انه اسمي صار توتي الا تبيتني بالشارع... بعدين والله

اسم سوسو ارجل من اسم توتي .. صار نفسي نبدل الاسامي.. طيب وهاي الهبله ما عرفتني ؟

ولك انا المواسرجي اللي نصبتوا عليه... بجوز لانه كان وجهي متشحبر .ااااااااااه ما في غير هيك

المهم انا قلتلها سوسووووووووووووووووو طبعا وانا مبتسم زي اللي صايبه كزاز ومش عارف كيف بدي اخلص من هالورطه
ا البنت شدتني من ايدي وقلتلي انت مش عارف اديش انا مشتائه احكي معك واشوفك

تعال نئعد جوه بس بتحب ناكل اشي قبل؟

انا طبعا ميت من الجوع قلتلها بنوكل .....والله رحنا عالبسطه وكان واقف عليها 3 شباب وبنت

المهم رحنا عند البنت قالتلي شو بتحب توكل؟ قلتلها شو في عندكم ؟ قالتلي بيجي خمسين شغله بالانجليزي مفهمتش منهم ولا كلمه
والله ورطه اللي تورطها هاي انا.........من اولها ....طيب كيف بدي ادبر حالي؟؟المهم قلتلها انا

بدي اكل زي ما انتي بتوكلي...راحت قالتلها انا باخد بج ماك قلتلها وانا كمان باخد بج مااااااااااك

انا بموت باشي اسمه بج مااااااااااااك عاودت البنت البياعه قالتلي تشيييز قلتلها شووووووووو؟

قالتلي تشييييييييييييييز ...قلت بعقلي انا والله هاي تشيز بعرفها لما كنا نتصور عند الجامع الحسيني كانوا يخلونا نحكي تشييز قال عشان نطلع بالصوره نضحك

فرحت انا فارد تمي من الدان للدان بس مش شايف ولا كاميرا بس قلت بجوز اي واحد بشتري

من عندهم بصوروه عشان الامن

البنت البياعه صارت تضحك قالتلي عفوا يا استاز بتحب معها تشيز يعني جبنه

قلتلها انا والله بدي اياها تشيز بس بدون جبنه

قالتلي طيب بدكم اشي تاني؟

قلتلها يخلف على امك بكفي.. لحد هان بلاش يطلعلنا كمان اسم انجليزي ومنعرفش ندبر حالنا

المهم انا قلت الاكل في هدا المطعم غالي واكيد راح يطلع الاكل اكتر من 70 او 80 قرش

رحت ضارب ايد عالجيبه طبعا انا معاي ليره و15 قرش يعني مغلين ومبحبحه معاي عالاخر

راحت البياعه بنت المحترمين قالتلي كله 6 ليرات ونص

طبعا انا قربت تصيبني جلطه شووووو ست ليرااااااات وكمان نص .. ول على شو طب هدول




الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
meko_86
مشرف قسم
مشرف قسم
avatar

عدد الرسائل : 178
العمر : 32
تاريخ التسجيل : 25/11/2006

مُساهمةموضوع: رد: مغامرات مواسرجي-في ماكدونالدز -الجزء التالت   الأربعاء أبريل 18, 2007 11:07 pm

--------هااااي البقية عشان قال الرسالة كبيرة-----------
الست ليرات امي بتقعد تطبخ شهر فيهم

فرحت انا من الصدمه قلتلها احييييييييييييه........

الا هي سوسو يتقولي توتييي......مالك؟ وشو هاي الكلمه؟

انا عرفت حالي خبصت الدنيا فرحت قلتلها هاي كلمه يابانيه معناتها على راسي

قالتلي جد ياي ما احلاها بتعرف انه انت كمان احيييييييه يعني على راسي يا روحي

قلتلها انا احيييه وانت احيييييه والوضع كله احيييييييه بس بتعرفي اني نسيت المصاري بالدار

البياعه رجعت علي وقالت طيب ممكن تدفع كريدت كارت قلت بعقلي مالها هاي متسلطه علي

قلتلها يعني بنفع ادفع عالكارت؟ قالت اه احنا بنقبل اي كارت قلتلها انا معاي كرت المؤن بنفع؟

والله البنتين صاروا يضحكوا المهم سوسو قالت خلص حبيبي انا بدفع وراحت طالت سفطه ليرات

ودفعت وقالتلي انا بعرف انه انتوا باليابان ما بتحملوا فلوس قلتلها لا بنحمل فلوس باليابان ولا

بواد الحداده ....ورحنا حملنا صينيتين وقعدنا عطاوله وهون بلشت المصايب انا بصراحه حاسس حالي زي الاطرش بالزفه
وهدول الولاد والبنات اللي بالمطعم كلهم بتطلعوا فيي وفي بنت في سلوك على سنانها نازله

بحلقه بوجهي ومسكينه مش لابسه غير فاريلا كنه اهلها مشحططين بالمره كنت بدي اقوم اعطيها

شلم بس استحيت .........طيب انا بدي اكل بس مش فاهم اشي من الاكل المحطوط

في بطاطا وشراب هدول كنت فاهمهم بس في اشي مدور ملفوف بورقه وفي معجون ...بجوز معجون اسنان وفي محارم فاين
انا صفنت في الاكل وما رضيت ابدا االاكل احسن تحكي عني مفجوع وصرت استنى فيها عشان

توكل بس هي متنحه وعيونها عليي ...مش هي لحالها كل المطعم صافن في خلقتي


وبعدييين بدنا نوكل ..انا قلت اول اشي لازم ابدا بالفاين اكيد حاطينه عشان الواحد يمخط اول

فرحت مسكت المحرمه واعطيتها تمخيطه من اللي يحبهم قلبك يعني صوتي زي زامور القلاب

واتطلعت في الناس هيك لقيتهم كلهم قلبوا وجههم عالجهه التانيه والبنت هاي ام السلوك

طعجت وجهها وقلبته وسوسو كمان معهم ...طيب احسن انا لو عارف انو رايحين تبطلوا تطلعوا فيي

هيك كان من زمان مخطت وصرت اتطلع في سوسو وقلتلها ما توكلي قالتلي بس انت توكل

المهم انا مسكت المدوره هاي الملفوفه بورق ورحت خاشم منها خشمه مع الورق مع كله

الا هي سوسو بتقوللي بتعرف انك بتحبني هلأ عرفت انك بتحبني عن جد قلتلها كيف؟

قالتلي لانك ناسي حالك وبتوكل السندويشه مع الورق قلتلها فعلا انا مش مركز عاد انا

فكرتها بتتاكل هيك والله هي صارت توكل شوي شوي وانا لغمطت الدنيا وشفتها حطت من معجون الاسنان اللي طلع لونه احمر رحت حطيت زيها والبنت هاي ام السلوك رجعت بحلقت فيي

فقلت بجوز جوعانه المسكينه ولا اشي قلت اعطيها شويه بطاطا الا هي سوسو بتقولي

انا اول مره باكل بالطريقه هاي فعلا انك بتفتح النفس عالاكل قلتلها والله انا بستعمل الطريقه

اليابانيه بالاكل عاد انا من الجوع بدي اكل الكرتونه قلتلي انت بعد ما رجعت من اليابان كيف شغلك؟

قلتلها فتحت محل قصدي عياده لتسليك المجاري البوليه والامور سالكه زي الدهب

قالتلي حلو كتير قلتلها وانتي؟ انا بصراحه بابا عنده شركات كتير والاهم هو كمان شخصيه كبيره

بالبلد وهو حابب يشوفك لاني قلتله عنك وانا بصراحه حبيتك يا توتي انا قلت بعقلي الله يلعن توتي وابو توتي
طيب انتي حبيتيني امر الله وابوكي ليش يدخل بالنص وليش بده يتعرف علي؟ ويا ترى بده يرجعلي العشرين ليره والعده ولا لأ؟

مليون شغله تشربكت براسي وبطلت اجمع كلمتين على بعض وهي صارت تحكي حكي بالحب

نصه مش فاهمه طبعا........ طبعا انا لازم اجاملها وارد فرحت قلتلها قبل ما اعرفك كانت روحي مسكره

وانتي فتحتيها انا قلبي بسيل وانتي اللي صلحتيه قلتلي ياي ما احلى كلامك كمان يا توتي

قلتلها بس خلاص يللا قومي ضبي العده قصدي يللا قومي خلينا نروح في عندي مواعيد مع ناس

والامور مسكره عندهم عالاخر بنحكي بعدين قالتلي اسمع انا عامله بارتي كبير بكره لازم تحضره

وانا وبابا وصاحباتي كلهم بدهم يتعرفوا عليك قلتلها بارطي؟ انا الحقيقه ما فهمتها قلتلها طيب

قالتلي بكره بحكي معك قلتلها طيب خلص لازم اروح هلأ والله طلعنا بره قالتلي وين سيارتك

قلتلها هديك عن ال190 موديل 64 بس بتشلق

قالتلي ياي شو كلاسيك نفسي بواحده زيها من زمان قالتلي مين اللي فيها ..عن صاحبي

قلتلها هدا الشوفير تبعي ورحت فلتها وطلعت بالسياره وهي بتطلع فيي وانا بس بدي اهرب

المهم صاحبي قالي شو صار قلتله القصه كلها بس قلتله انا مش رايح اقابلها كمان مره

قاللي ليش ؟ قلتله هاي البنت شكلها مسكينه وهبله وانا كان بدي واحده متلي بنفس مستواي

قاللي من اجيب لحضرتك واحده بنفس مستواك من الانترنت انت ممكن اجيبلك واحده من مستواك

من سوق الحراميه من الجوره من تحت سقف السيل من منهل مجاري بس من النت ما في من مستواك
قلتله بلاش انا ما بدي اخدعها واخمها بحالي بعدين ولك هاي مسكينه وحرام هيك

قاللي هسه صرت تفهم بالحلال والحرام هاي الحفله بدنا نحضرها غصبن عنك بدنا نحضرها

قلتله انو حفله؟ قاللي ولك بارطي يعني حفله وهم عاملين حفله عشانك واكيد فيها اكل وشرب

وبنات راح نكيف انا وياك بعدين انت نسيت انه ابوها نصب عليك بعشرين ليره والعده

قلتله وحضرتك بدك تيجي معي بصفتك شو؟

قاللي ولك انا اشوفير تبعك انا مستعد اكون الخدام تبعك واعملك كل اشي بس خليني اروح معك

مشان الله توافق وصار يترجى فيي قلتله بفكر بالموضوع

روحت عالدار وانا راسي بوجعني من التفكير وحاسس انه الدنيا كلها غلط وحطيت راسي ونمت

بس كنت مقرر خلص اني ما راح اروح عالحفله

صحيت الصبح على امي بتهزني وبتقوللي يما قوم بسرعه دار ابو اسحق المجاري مسكره عندهم

وبسالوا عتك

انا قمت بسرعه وغسلت وجههي واخدت العده ورحت عدار ابو اسحق قاللي يا خوي بسرعه

المجاري عبت البيت بعرضك تسلكلنا اياها بسرعه

ساعتها تزكرت حالي وانا عامل حالي دكتور بس انا فعلا زي الدكتور وهي ابو اسحق اكبر دليل

مش قادر يعيش من غيري وصرت اضحك ابو اسحق قاللي ولك مالك بتضحك؟

رحت كشرت فيه وقلتله بس تحكي معي لا تقول ولك بتناديني يا دكتور فاهم ولا لا؟


قاللي حاضر حاضر يا دكتور بس انت سلكلنا اياها وبخليك رئيس الدكاتره

رحت انا فتحت المنهل ولا هو مليان صراصير بيجي مليون صرصور بس كبار الواحد قد العصفور


بس انا ما بهمني الصراصير متعود عليهم رحت نزلت جوه المنهل والصراصير بتنطط حوالي

ولا هو التلفون الخلوي برن .....ايوه مين على هالصبح بده اياني؟

رديت ولا هي سوسو صباح الفل يا حبيبي اشتئت اسمع صوتك كيفك يا روحي

قلتلها هلا هلا صباح الخير انا زي الدهب احسن من هيك مفش

ورحت كشيت صرصورين عن رقبتي

قالتلي من وين بتحكي؟

قلتلها من المنهل....... قصدي من العياده

قالتلي اكيد في عندك مراجعين كتير

تطلعت هيك عالصراصير وقلتلها عندي مراجعين زي زخ المطر يعني اذا بتحبي تراجعي تعالي عندي

وتزكرت بيت الشعر اللي بحكي

ولقد زكرتك والرياح مناهل وصراصير الهند تفطر من دمي

قالتلي احنا على موعدنا اليوم الساعه سته بنفس المكان تبع امبارح لا تنسى

قلتلها طيب طيب خلص بنحكي بعدين المراجعين هجموا عليي

وسكرت الخط وبلشت اكش بالصراصير المهم سلكنا الخط وبدي اطلع من المنهل قصدي العياده

ولا هو صاحبي واقف فوق راسي بقوللي وين من الصبح بدور عليك يللا قوم عشان نزبطك

ونروح عالحفله





pppp تو بي كونتينيود يعني استنونا لبكرة pppp
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
لمسة وفا
مشرف عام
مشرف  عام
avatar

عدد الرسائل : 670
تاريخ التسجيل : 06/11/2006

مُساهمةموضوع: رد: مغامرات مواسرجي-في ماكدونالدز -الجزء التالت   الخميس أبريل 19, 2007 12:46 am

يسلمووو ميكو على التكمله بس شو عامللنا اكشن عند اللقطه المهمه
بليز لاتتاخر في التكمله بدي اشوف شو صار بالحفله

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
meko_86
مشرف قسم
مشرف قسم
avatar

عدد الرسائل : 178
العمر : 32
تاريخ التسجيل : 25/11/2006

مُساهمةموضوع: رد: مغامرات مواسرجي-في ماكدونالدز -الجزء التالت   الخميس أبريل 19, 2007 12:53 am

هاي الحفلة قصتها قصة لسه
ازا الكبير بقولي احط باقيتها بحط الباقي هلأ
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
مجروح
عضو جديد
عضو جديد
avatar

عدد الرسائل : 8
تاريخ التسجيل : 11/11/2006

مُساهمةموضوع: رد: مغامرات مواسرجي-في ماكدونالدز -الجزء التالت   الخميس أبريل 19, 2007 8:14 pm

هههههههههههه
نزل الجزء الثالث
بسرعة
يعطيك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://endlesslove.editboard.com/profile.forum
القلب الكبير
Admin
avatar

عدد الرسائل : 750
العمر : 32
تاريخ التسجيل : 26/10/2006

مُساهمةموضوع: رد: مغامرات مواسرجي-في ماكدونالدز -الجزء التالت   الخميس أبريل 19, 2007 8:25 pm

يعطيك العافية يا ابو شريك
نزللنا الجزء الثاني بدنا نغلبك
خلينا نشوف هالازعر وين بده يصل

_________________





الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
مغامرات مواسرجي-في ماكدونالدز -الجزء التالت
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: القسم الترفيهي :: نكت الحب الابدي-
انتقل الى: